Jardunaldiaren atarikoa.

Asteburu oso interesgarria daukagu aurretik, gaur gauean hasita, partidu oso erakargarriak utziko dizkigunak eta beti bezala, beraiei adi-adi egongo gara.

Esan dugu jardunaldia gaur bertan hasten dela eta ez nolanahiko partiduarekin gainera: gizonezkoen senior lehen mailako lehen bi sailkatuen arteko partiduarekin! BKE Soraluce eta Inter Demitente nor baino nor gehiago arituko dira bigarrenaren kantxan, gaur, 20:00etatik aurrera, lehen postua jokoan dutela. Baina emakumezkoen lehen mailari ere adi egon beharko dugu, hiru talde baitaude aurreneko postuan berdinduta eta emozioak bor-bor egiten duelako lehiaketa honetako jardunaldi bakoitzean.

Adinaz beste alderaino jota, errendimenduzko haur mailarekin goaz jarraian, promozioa jokatzeko kanporaketak biziko ditugulako bertan. Nesketan, hauek izango dira lehiak: Bera Bera vs Antigua Luberri Ibaeta alde batetik, eta Ordizia Lacturale vs Ostadar bestetik. Mutilei dagokionez, hauexek izango dira ikusi ahal izango ditugun partidua: Marmoles Aztiria ISB vs TAKE Urdin eta Antigua Luberri KE Urdin vs Ordizia KE 09.

Jardunaldiko gainontzeko partiduetatik beste bi aipatzea ere nahiko genuke: nesken errendimenduzko kadete A1ean ZAST Kuraye (3-0) Ostadar Aren (2-1) kontrakoa batetik, eta mutilen errendimenduzko junior A2an Usoa Ganbara BKEk Askatuak Hollisen kontra jokatuko duena bestetik, biak ala biak partidu guztiak irabazita baitaude orain arte.